Khaali Hai Talab-Garon Se Bazar-E-Tamanna

ḳhālī hai talab-gāroñ se bāzār-e-tamannā

aatā hī nahīñ koī ḳharīdār-e-tamannā

har chand ki rahtā hai vo bezār-e-tamannā

dāman meñ sameTe hai magar ḳhār-e-tamannā

sab apnī ḳhamoshī kā lahū chaaT rahe haiñ

kartā hī nahīñ ab koī iz.hār-e-tamannā

is qasr-e-havas se koī bāhar nahīñ aatā

kahne ko to har shaḳhs hai bezār-e-tamannā

paivand-e-zamīñ kar na sakā sail-e-balā bhī

hai sar-ba-falak aaj bhī dīvār-e-tamannā

koī bhī nahīñ kam hai kisī se yahāñ ‘aḳhtar’

har shaḳhs hai is shahr meñ shahkār-e-tamannā

Leave a Comment