abdullah-javed

Chamka Jo Chand Raat Ka Chehra Nikhar Gaya

chamka jo chand raat ka chehra nikhar gaya

mange ka nuur bhi to bada kaam kar gaya

ye bhi bahut hai sainkadon paude hare hue

kya gham jo barishon men koi phuul mar gaya

sahil pe log yunhi khade dekhte rahe

dariya men ham jo utre to dariya utar gaya

saaya bhi aap ka hai faqat raushni ke saath

DhunDoge tirgi men ki saaya kidhar gaya

ham jis ke intizar men jaage tamam raat

aaya bhi vo to khvab ki surat guzar gaya

ham ne to gul ki chand ki taare ki baat ki

sab ahl-e-ajnuman ka guman aap par gaya

ghar hi nahin raha hai salamat bataen kya

‘javed’ ke baad sail-e-bala kis ke ghar gaya

More Poems

Leave a Comment