Shuja Khaavar
us bevafa ka shahr hai aur vaqt-e-sham hai
aaise men aarzu baḌi himmat ka kaam hai
ham ko bhi chhoḌta hua aage nikal gaya
jazbon ka qafila bhi baḌa tez-gam hai
be-arzu bhi ḳhush hain zamane men baaz log
yaan aarzu ke saath bhi jiina haram hai
lafzon ki jaan chhoḌ de mafhum ko pakaḌ
varna ye sab muamla tajnis-e-tam hai
tauba ke silsile men bas itna kahenge ham
maslak ho bada-noshi to tauba haram hai
a.ankhon ka hai ḳhayal ki daana hai daam men
aur fikr kah rahi hai ki daane men daam hai
naqqad tum ko puchhte aa.e the kal ‘shuja’
kahte the sha.iron men tumhara bhi naam hai
Leave a Reply