ab misr men kahan koi bazar mo’atabar
yusuf hi mo’atabar na ḳharidar mo’atabar
aise men sochta huun kise mo’atabar kahun
milta nahin hai jab koi kirdar mo’atabar
rahzan chhupe hue hain pas-e-sang-e-mil-e-rah
mutlaq nahin hai saya-e-ashjar mo’atabar
tarik shab hai aur larazte hue charagh
lagte nahin hain sub.h ke asar mo’atabar
kahne ko sarfarosh the janbaz the bahut
Thahre akele ham hi sar-e-dar mo’atabar
mahfil men ahl-e-fan bhi ye kahne lage ‘habab’
puḳhta tira suḳhan tire ash.ar mo’atabar
Leave a Reply