use jab bhi dekha bahut dhyan se
to palkon men aine sajne lage
khusha ai sar-e-sham bhige shajar
tire zakhm kuchh aur gahre hue
musafir pe khud se bichhadne ki rut
vo jab ghar ko laute bahut dil dukhe
kahin duur sahil pe utre dhanak
kahin naav par amn-badal chale
bahut tirgi mere mahlon men thi
dariche jo khole to manzar uge
ajab aanch hai dil ke daman talak
koi aag jaise hava men bahe
bahut dastaken thiin vo thahra bhi tha
hava tez ho jab to kya dar khule
vo chaha gaya tha jinhen tuut kar
parae mile the parae gae
tira nutq hi mujh ko zanjir tha
abhi tak na mujh se ye halqe khule
Leave a Reply