fahmida-riaz

Bakira

asman tapte hue lohe ki manind safed

reg sukhi hui pyase ki zaban ki manind

pyaas hulqum men hai jism men hai jaan men hai

sar-ba-zanu huun jhulaste hue registan men

teri sarkar men le aai huun ye vahsh zabih!

mujh pe lazim thi jo qurbani vo main ne kar di

us ki ubli hui ankhon men abhi tak hai chamak

aur siyah-bal hain bhige hue khuun se ab tak

tera farman ye tha us pe koi daagh na ho

so ye be-aib achhuta bhi tha an-dekha bhi

be-karan reg men sab garm lahu jazb hua

dekh chadar pe miri sabt hai us ka dhabba

ai khuda-vand-e-kabir

ai jabbar!

mutakabbir o jalil!

haan tire naam padhe aur kiya zabh use

ab koi para-e-abr aae kahin saaya ho

ai khuda-vand-e-azim

bad-e-taskin! ke nafas aag bana jaata hai!

qatra-e-ab ki jaan lab pe chali aai hai

More Poems

Leave a Comment