chal diya naaz zamane ke uthane vaala
saare ghar le gaya ghar chhod ke jaane vaala
aankh pur-nam hai yahi soch ke ahl-e-dil ki
laut kar ab nahin aaega hansane vaala
baat to karte hain sab log vafa ki lekin
kis ne dekha hai kahan par hai nibhane vaala
ab pareshan sa phirta hai zamane bhar men
zakhm-e-dil par mire tezab lagane vaala
shukr-e-rab hai miri phulon pe guzari us ne
aag pe soya hai barud bichhane vaala
ham ne dekha hai shab-o-roz zamane men ‘sabin’
surkh-ru hota hai sajdon ko sajane vaala
Leave a Reply