abdul-mannan-tarzi

Muddaa-O-Arzu Shauq-e-Tamanna Aap Hain

muddaa-o-arzu shauq-e-tamanna aap hain

kis ko kis ko main bataun mere kya kya aap hain

mai-kada saghar surahi aur sahba aap hain

jo kisi surat na utre aisa nashsha aap hain

jis pe karti hai mohabbat meri daava aap hain

jis ka dil sham-o-sahar padhta vazifa aap hain

ai miri jan-e-ghazal shahr-e-vafa-o-shauq men

meri azra aur salma meri nuura aap hain

aap hain ai jan-e-jan mere sukhan ki aabru

sach to ye hai ki ghazal ka misraa misraa aap hain

aap ki zulfon ka main hi to nahin tanha asiir

kar gai barbad jo zahid ki taqva aap hain

jazba-e-pakiza mere dil ka hain kuchh aap hi

meri chashm-e-shauq ka saara tamasha aap hain

ahd-e-piri men ghazal ‘tarzi’ miyan aisi javan

ishq men kis ke bhala itne bhi rusva aap hain

More Poems

Leave a Comment