suhane ḳhvab ankhon men sanjona chahta huun
men ab aram se kuchh der sona chahta huun
shajar ko bar-avar dekhna maqsad nahin hai
ki men to bas zamin par ḳhvab bona chahta huun
mire hanste hue bachcho ye saara ghar tumhara
main rone ke liye bas ek kona chahta huun
navah-e-zist men kyuun barishen hoti nahin hain
main pichhle mausamon ke zaḳhm dhona chahta huun
bas us ke aane tak mausam mujhe sarsabz rakhna
use ik ḳhaar ab main bhi chubhona chahta huun
mujhe be-ḳhvab rakhti hai kabhi duniya kabhi dil
main bachchon ki tarah be-fikr sona chahta huun
havao kya tumhara mehrban shana milega
dahaḌen maar kar main aaj rona chahta huun
jise hai jaan aziiz apni utar jaa.e kinare
main apni naav maujon men Dubona chahta huun
‘salim’ ab andhiyon se ham-rakabi kis liye hai
sar-e-mizhgan bacha kya hai ki khona chahta huun
Leave a Reply