Aks Samastipuri
ek raat lagti hai ik sahar banane men
ham ne kyon nahin socha ham-safar banane men
manzilen badalte ho par tumhen nahin malum
umren biit jaati hain rahguzar banane men
umr bhar raha ham par us ka hi asar haavi
be-asar rahe jis par ham asar banane men
mauj men banata huun jism jis parinde ka
ruuh kaanp uThti hai us ke par banane men
teri yaad ki gaaḌi kuchh madad karen shayad
is tavil raste ko muḳhtasar banane men
Leave a Reply