sahar hote hi ahl-e-anjuman ko niind si aa.i
andhere aur gahre ho ga.e jab raushni aa.i
dam-e-sair-e-chaman aksar ye manzar ham ne dekha hai
jidhar tum the udhar phulon ke ruḳh par tazgi aa.i
siva.e shorish-e-parvaz sab kuchh hai gulistan men
bahar aa.i magar ik daam phailati hui aa.i
abhi tak maut se milta hua ik nashsha taari tha
tum aa.e zindagi ka hosh aaya zindagi aa.i
main tark-e-ishq par nazan tha lekin vaqi.a ye hai
ki aaj un ka ḳhayal aaya to apni yaad bhi aa.i
sabab kuchh aur tha meri musalsal tishna-kami ka
main ye samjha ki saaqi ki tavajjoh men kami aa.i
andhere men hain kitne tishnigan-e-mai-kada ‘shahid’
jahan tak daur-e-jam aaya vahin tak raushni aa.i
Leave a Reply