Sattar Syed
vahi hai dasht-e-safar rahguzar se aage bhi
vahi ḳhala hai hudud-e-nazar se aage bhi
vo aftab isi sahn men muallaq hai
agarche ghar hain bahut us ke ghar se aage bhi
hamare dam se hai qaa.em zamin ki zarḳhezi
hamara faiz hai shaḳh-e-shajar se aage bhi
talash-e-nur men ham barha nikal aa.e
nazar ke saath hudud-e-safar se aage bhi
ghalat umiid na bandh in nahif logon se
koi uḌa hai bhala bal-o-par se aage bhi
yahan se lauT chalo jaan ki amaan chaho
ka.i tilism hain divar-o-dar se aage bhi
Leave a Reply