ishq ke naam pe daa.im rahe zindan abad
chak-e-taza se rahe mera gareban abad
qais ke ba.ad kisi ne kabhi puchha hi nahin
ham ko hi karna paḌa phir se bayaban abad
taḳhtiyan laTki hui naam ki darvazon par
ham ne dekhe hain yahan kitne hi zindan abad
ham ne rakkhi na kabhi apne gharondon pe nazar
ham ne dekhe hain sada ḳhvab ke aivan abad
kahin iman men ilhad mila hai shamil
nazar aaya hai kahin kufr men iman abad
kabhi tufan men qatra bhi nahin tha shamil
aur dekha hai kabhi qatre men tufan abad
ek duniya hai yahan ek zamana hai yahan
yunhi har aan rahe ye mira divan abad
Leave a Reply