bhar nahin paaya abhi tak zaḳhm-e-kari haa.e haa.e
dil ko thame hain lahu phir bhi hai jaari haa.e haa.e
dard ka ehsas ghaT jaata agar chahe koi
ho rahi hai aur ulTe dil-figari haa.e haa.e
jism to pahle hi zaḳhmi tha magar baaqi tha dil
ab adu ke haath men ḳhanjar hai bhari haa.e haa.e
hijr men vaise bhi aati hai musibat jaan par
par raqibon ki alag hai ḳhanda-kari haa.e haa.e
reza reza kar diya zalim ne saare jism ko
uḌ rahi hai ḳhaak pairon par hamari haa.e haa.e
dil girafta ho ke chup baiThe hain shayad is tarah
rahm aa.e dekh kar surat hamari haa.e haa.e
dast-e-qatil said banne se nahin rukta kabhi
hai abas be-chargi-o-ah-o-zari haa.e haa.e
jo parinde uḌ nahin sakte ab un ki ḳhair ho
aane vaala hai isi janib shikari haa.e haa.e
raah se patthar uTha kar su-e-zalim phenk de
gar nahin tiron ki tujh men zarb-kari haa.e haa.e
ek qibla ik azaan aur ek majlis ik imaam
kaash aa jaa.e samajh men ye tumhari haa.e haa.e
Leave a Reply