Zahida Zaidi
ye khvabon ke saae
miri niind ki shant vaadi men
kis tarah aae
kisi aur duniya ke mauhum paikar
kisi aur jangal ki shakhon ke saae
pur-asrar jazbon ki barish men bhige nahae
gurezan kai saaton ko uthae
mire paas aae
magar main badhi jab bhi
in dhundle khakon ko mutthi men bharne
vo ghaeb hue pech khate hue
ik ghani dhund men
haath mere na aae
magar jab kabhi haath aae
to un be-sada paikaron ne
nihan khana-e-arzu ke
kai raaz mujh ko batae
kai daagh mujh ko dikhae
ye khvabon ki basti
ki jis ki pur-asrar rahon men gum
raat bhar meri hasti
koi us ki gahraiyon ko bhala kaise paae
koi is ke sab raaz kaise batae
Leave a Reply