Ab Faisla Karne Ki Ijazat Di Jae

ab faisla karne ki ijazat di jaae

ya phir hamen manzil ki basharat di jaae

divane hain ham jhuut bahut bolte hain

ham ko sar-e-bazar ye izzat di jaae

phir gard-e-mah-o-sal men at jaenge

aina banaya hai to surat di jaae

israr hi karte ho to apna samjho

dena hi agar hai to mohabbat di jaae

vo jis ne mujhe qatl pe uksaya tha

us shakhs se milne ki bhi mohlat di jaae

jab meri gavahi bhi mire haq men nahin

phir shahr men kis kis ki shahadat di jaae

ham jagte rahne ke bahut aadi hain

ham ko shab-e-hijran ki masafat di jaae

chhid jaae to tabqat ki ab jang ‘salim’

kuchh bhi ho magar ham ko na zahmat di jaae

Leave a Comment