wali-mohammad-wali

Dil Hua Hai Mera Kharab-E-Sukhan

dil hua hai mira kharab-e-sukhan

dekh kar husn-e-behijab-e-sukhan

bazm-e-maani men sarkhushi hai use

jis kuun hai nashsha-e-sharab-e-sukhan

rah-e-mazmun-e-taza band nahin

ta-qayamat khula hai bab-e-sukhan

jalva-paira ho shahid-e-maani

jab zaban suun uthe naqab-e-sukhan

gauhar us ki nazar men ja na kare

jin ne dekha hai ab-o-tab-e-sukhan

harja-goyan ki baat kyunki sune

jo suna naghma-e-rabab-e-sukhan

hai tiri baat ai nazakat-e-fahm

lauh-e-dibacha-e-kitab-e-sukhan

hai sukhan jag manin adim-ul-misal

juz sukhan niin duja javab-e-sukhan

ai ‘vali’ dard-e-sar kabhu na rahe

jab mile sandal-o-gulab-e-sukhan

More Poems

Leave a Comment