havas ne mujh se puchha tha tumhara kya irada hai
badan kar-e-mohabbat men bara.e istifada hai
kabhi pahna nahin us ne mire ashkon ka pairahan
udasi meri ankhon men azal se be-libada hai
bhaḌak kar sho.ala-e-vahshat lahu men bujh gaya hoga
zara si aag thi lekin dhuan kitna ziyada hai
agar tum ghaur se dekho ruḳh-e-mahtab kam paḌ jaa.e
falak par ik sitare ki jabin itni kushada hai
mujhe maskan samajhte hain ajab aaseb hain gham ke
main ik do se nimaT bhi luun ye puura ḳhanvada hai
use dhande se matlab hai vo dimak bechne vaala
use vo ḳhaak samjhega ye ḳhvabon ka burada hai
ham us se chaah kar bhi bach nahin sakte kisi surat
nibhana paḌta hai is ko mohabbat ek va.ada hai
mujhe shatranj ke ḳhanon men chalna tu sikha.ega
main farzi ban chuka kab ka tu ab tak ik piyada hai
na-jane katib-e-taqdir ne kya likh diya us par
miri taqdir ka saf.ha na sidha hai na saada hai
main is halat men ‘zeb’ aḳhir kahan chalte hue ja.un
na mujh men hausla baaqi na manzil hai na jaada hai
Leave a Reply