momin-khan-momin

Ai Aarzu-E-Qatl Zara Dil Ko Thamna

ai arzu-e-qatl zara dil ko thamna

mushkil pada mira mire qatil ko thamna

tasir-e-be-qarari-e-nakam afrin

hai kaam un se shokh-e-shamail ko thamna

dekhe hai chandni vo zamin par na gir pade

ai charkh apne tu mah-e-kamil ko thamna

muztar huun kis ka tarz-e-sukhan se samajh gaya

ab zikr kya hai sama-e-aqil ko thamna

ho sarsar-e-fughan se na kyunkar vo muztarib

mushkil hua hai parda-e-mahmil ko thamna

sikhe hain mujh se nala-e-nai asman-shikan

sayyad ab qafas men anadil ko thamna

ye zulf kham-ba-kham na ho kya tab-e-ghair hai

tere junun-zade ki salasil ko thamna

ai hamdam aah talkhi-e-hijran se dam nahin

girta hai dekh jam-e-halahil ko thamna

simab-var mar gae zabt-e-qalaq se ham

kya qahr hai tabiat-e-mail ko thamna

aghosh-e-gor ho gai akhir lahuluhan

asan nahin hai aap ke bismil ko thamna

siine pe haath dharte hi kuchh dam pe ban gai

lo jaan ka azaab hua dil ko thamna

baaqi hai shauq-e-chak-e-gareban abhi mujhe

bas ai rafugar apni anamil ko thamna

mat mangiyo amaan buton se ki hai haram

‘momin’ zaban-e-behuda saail ko thamna

More Poems

Leave a Comment