Insha Allah Khan Insha
aane atak atak ke lagi saans raat se
ab hai umiid sirf khuda hi ki zaat se
saaqi hava-e-sard ko tu sarsari na jaan
kaifiyyat us ki puchh nabat-e-nabat se
apna sanam vo qahr hai ai barhaman ki gar
dekhe manat ko to gira deve laat se
kal se to ikhtilat men taaza hai ikhtiraa
rukne lagi hain aap miri baat baat se
pesh aaiye ba-shafqat-o-lutf us se shaikh ji
bint-ul-anab ko janiye apne nabat se
hasil kiya jo ham ne qadam-bos-e-pir-e-dair
aai sada-e-ishq dar-e-somnat se
hain vajib-ul-vajud ke anvar ishq men
us ki sifat-e-zat nahin mumkinat se
ashar-e-taba-zad miri sun ke shokh vo
kahne laga ki faeda is mohmalat se
mutlaq mila ke aankh idhar dekhte nahin
aate nazar ho aaj bhi kam iltifat se
‘insha’ ne aa laga hi liya tum ko baat men
zalim vo cukta hai koi apni ghaat se
Leave a Reply