kis dasht-e-talab men kho ga.e ham
saaya jo mila to so ga.e ham
lo aaj bhula diya tumhen bhi
lo aaj tumhare ho ga.e ham
ai shama-e-firaq bujh chuki shab
ai sa.at-e-vasl so ga.e ham
phir apna nishan kahin na paaya
uTh kar tire saath to ga.e ham
yuun sub.h ke bhule apne ghar ko
lauTe hain ki aur kho ga.e ham
jab aankh khuli to ham nahin the
jaage hain ki ḳhvab ho ga.e ham
ashkon ne ajiib gul khila.e
kya naqsh-o-nigar bo ga.e ham
khoya hai use to ḳhud ko paaya
paaya hai use to kho ga.e ham
Leave a Reply