amiir laakh idhar se udhar zamana hua
vo but vafa pe na aaya main be-vafa na hua
sar-e-niyaz ko tera hi astana hua
sharab-khana hua ya qimar-khana hua
hua farogh jo mujh ko gham-e-zamana hua
pada jo daagh jigar men charagh-e-khana hua
ummid ja ke nahin us gali se aane ki
ba-rang-e-umr mira nama-bar ravana hua
hazar shukr na zaae hui miri kheti
ki barq o sail men taqsim daana daana hua
qadam huzur ke aae mire nasib khule
javab-e-qasr-e-sulaiman gharib-khana hua
tire jamal ne zohra ko daur dikhlaya
tire jalal se mirrikh ka zamana hua
koi gaya dar-e-janan pe ham hue pamal
hamara sar na hua sang-e-astana hua
farogh-e-dil ka sabab ho gai bujhi jo havas
sharar-e-kushta se raushan charagh-e-khana hua
jab aai josh pe mere karim ki rahmat
gira jo aankh se aansu dur-e-yagana hua
hasad se zahr tan-e-asman men phail gaya
jo apni kisht men sarsabz koi daana hua
chune mahinon hi tinke gharib bulbul ne
magar nasib na do roz ashiyana hua
khayal-e-zulf men chhai ye tirgi shab-e-hijr
ki khal-e-chehra-e-zakhmi charagh-e-khana hua
ye josh-e-girya hua mere said hone par
ki chashm-e-dam ke aansu se sabz daana hua
na puchh naz-o-niyaz us ke mere kab se hain
ye husn o ishq to ab hai use zamana hua
uthae sadme pe sadme to aabru paai
amiir tuut ke dil gauhar-e-yagana hua
Leave a Reply