kaaba o dair men jalva nahin yaksan un ka
jo ye kahte hain tatole koi iman un ka
justuju ke liye niklega jo khvahan un ka
ghar bata dega koi mard-e-musalman un ka
tu ne didar ka jin jin se kiya hai vaada
haae re un ki khushi haae re arman un ka
apne mitne ka sabab main bhi bata duun ai shauq
kaash chhu jaae miri khaak se daman un ka
chhod kar aae hain jo subh-e-vatan si shai ko
martaba kuchh to samajh sham-e-ghariban un ka
jin ki aghosh-e-tasavvur men hai vo huur jamal
kahin sach ho na yahi khvab-e-pareshan un ka
jo is uljhao ke khud hain mutamanni dil se
kya bigadegi tiri zulf-e-pareshan un ka
sar men sauda-e-khirad paanv men zanjir-e-shukuk
bhed paega na is shakl se insan un ka
ham dua den tujhe dil khol ke ai pahlu-e-tang
tuut kar siine men rah jaae jo paikan un ka
chaak karne ka hai ilzam mire sar nahaq
haath un ke hain ham un ke hain gareban un ka
vo mita kyuun nahin dete mujhe hairat to ye hai
un ke kahne men hai dil dil men hai arman un ka
un shahidan-e-mohabbat men to main saaf kahun
koi itna nahin pakde jo gareban un ka
vahi aise hain ki khamosh hain sab ki sun kar
sab ko daava hai ki huun banda-e-farman un ka
pahle ham niyat-e-khalis se vazu to kar len
thahar ai khaak thahar paak hai daman un ka
chahen dozakh men utaren ki jagah khuld men den
dakhl kya ghair ko ghar un ke hain mehman un ka
kahin paivand ki koshish kahin tadbir-e-rafu
jama-e-tan se bahut tang hai uryan un ka
kijiye shana o aina ki halat pe nigah
sina-sad-chak koi hai koi hairan un ka
maan lo paanv se zanjir bhi utri lekin
bhaag kar jaae kahan qaidi-e-zindan un ka
jin shahidon ne ba-sad-dard tadap kar di jaan
chhin gaya haath se jiita hua maidan un ka
ham to kya chiiz hain jibril to ja len un tak
rok leta hai farishton ko bhi darban un ka
mast jaate hain kharabat se masjid ki taraf
raah pur-shor hai allah nigah-ban un ka
ham shab-e-hijr ke jaage na qayamat men uthen
jab talak khvab se chaunkae na arman un ka
vahm tu hi khalal-andaz hua hai varna
kaun juuya nahin ai rahzan-e-iman un ka
din qayamat ka dhala sab ne muraden pain
rah gaya dekh ke munh taba-e-farman un ka
marne valon ka agar saath diya puura kar
le janaza bhi utha hasrat o arman un ka
haq jatate hain shahidan-e-mohabbat bekar
kya ye marna tha bada kar-e-numayan un ka
‘shad’ ghabra gaya ik umr se jiite jiite
vo bula len mujhe is vaqt to ehsan un ka
Leave a Reply