agar phir shahr men vo ḳhush-ada vapas palaT aa.e
mulaqaton ka shayad silsila vapas palaT aa.e
main us ko bhuul ja.un raat ye mangi dua main ne
karun kya main agar meri dua vapas palaT aa.e
guzarta hi nahin mausam juda.i ke dayaron ka
milan-rut ke kinaron se hava vapas palaT aa.e
vo ab un raston par hai jahan bas phuul khilte hain
bulave ki mire har ik sada vapas palaT aa.e
na.e raste mubarak us ko lekin kuchh qadam baḌh kar
bichhaḌne ka mujhe de hausla vapas palaT aa.e
Leave a Reply