tumhare vasl ka bas intizar baaqi hai
main rang rang huun lekin singhar baaqi hai
hava.en tham ga.iin gard-o-ghubar baiTh gaya
ik apni zaat ka bas intishar baaqi hai
tamam umr pilaya hai jis ko apna lahu
us ek phuul pe ab tak nikhar baaqi hai
tumhare naam ki ḳhushbu se rach ga.i hai faza
sada ki guunj men paiham pukar baaqi hai
jo ghaon bhar gaya us ka nishan hai ab tak
us ek zaḳhm men ab bhi bahar baaqi hai
jo raat hijr ki guzri tumhare pahlu men
us ek shab ka abhi tak ḳhumar baaqi hai
tum ek bhuli hui dastan ho lekin
tumhari yaad men ik sogvar baaqi hai
Leave a Reply