nahin ki tere ishare nahin samajhta huun
samajh to leta huun saare nahin samajhta huun
tira chaḌha hua dariya samajh men aata hai
tire ḳhamosh kinare nahin samajhta huun
kidhar se nikla hai ye chand kuchh nahin ma.alum
kahan ke hain ye sitare nahin samajhta huun
kahin kahin mujhe apni ḳhabar nahin milti
kahin kahin tire baare nahin samajhta huun
jo daa.en baa.en bhi hain aur aage pichhe bhi
unhen main ab bhi tumhare nahin samajhta huun
ḳhud apne dil se yahi iḳhtilaf hai mera
ki main ghamon ko ghubare nahin samajhta huun
kabhi to hota hai meri samajh se bahar hi
kabhi main sharm ke maare nahin samajhta huun
kahin to hain jo mire ḳhvab dekhte hain ‘zafar’
koi to hain jinhen pyare nahin samajhta huun
Leave a Reply