haan usi din dhuup men haryaliyan shamil huiin
is zamin ki zardiyon men laliyan shamil huiin
bad-e-azadi men ham sab nachne valon ke saath
phuul pahne raqs karti daliyan shamil huiin
bu-e-gul se janiye kyuun bu-e-khun aane lagi
baagh men jab se tiri rakhvaliyan shamil huiin
qahr to us vaqt tuuta tha saf-e-aada men jab
chashm-o-lab se qatl karne valiyan shamil huiin
khair ko shar aur shar ko khair karne men yahan
janiye kin kin ki bad-aamaliyan shamil huiin
itna pyara ho gaya huun doston ko kya kahun
jab bhi mera zikr aaya galiyan shamil huiin
Leave a Reply