Krishna Mohan
koi ummid na bar aa.i shakeba.i ki
is ne baton men bahut hashiya-ara.i ki
ishq din-rat raha kaif-o-tarab men sarshar
husn ne saltanat-e-ishq pe dara.i ki
na mila par na mila apne masa.il ka hal
astanon pe bahut ham ne jabin-sa.i ki
aah ai soz-e-darun mere junun se ab tak
manzilen sar na huiin badiya-paima.i ki
soch ka loch kabhi un ko mayassar na hua
ba.az logon ne faqat qafiya-paima.i ki
kar-e-bekar hui bus men safar karta huun
ye bhi ik surat-e-be-kaif hai mahnga.i ki
sher kahta rahun bahta rahun apni rau men
chheḌ chalti rahe ehsas ki purva.i ki
ek sher aur suna de ki zamane bhar men
dhuum hai tere taghazzul ki tavana.i ki
tang-zarfi hai mire vahm ka Thahra paani
Thahre paani pe jami kaa.i hai ḳhud-ra.i ki
va daregha ki zara qadr na ki duniya ne
‘krishn-mohan’ tire irfan ki gahra.i ki
Leave a Reply