Farigh Bukhari
teri ḳhatir ye fusun ham ne jaga rakkha hai
varna ara.ish-e-afkar men kya rakkha hai
hai tira aks hi a.ina-e-dil ki zinat
ek tasvir se album ko saja rakkha hai
barg-e-sad-chak ka parda hai shagufta gul se
qahqahon se ka.i zaḳhmon ko chhupa rakkha hai
ab na bhaTkenge musafir na.i naslon ke kabhi
ham ne rahon men lahu apna jala rakkha hai
ham se insan ki ḳhajalat nahin dekhi jaati
kam-savadon ka bharam ham ne rava rakkha hai
kis qayamat ka hai didar tira va.ada-shikan
dil-e-betab ne ik hashr uTha rakkha hai
koi mushkil nahin pahchan hamari ‘farigh’
apni ḳhushbu ka safar ham ne juda rakkha hai
Leave a Reply