hama-girya silk-e-shabnam hama-ashk bazm-e-anjum
jo na gul bhi muskura.e to kahan rahe tabassum
na ḳhata miri nazar ki na gunah tire karam ka
ki nasib-e-ashiqan hai ye shikast-e-be-tasadum
thi bhari bahar lekin gul-o-bu-e-gul ne samjha
nigah-e-chaman se chhup kar jo kabhi mile hain ham tum
kahin barq jagmaga.i kahin phuul muskura.e
jo tire labon ko chhukar hua muntashir tabassum
koi raah hai mohabbat to hujum hai javani
kahin paanv Dagmaga.e kahin zindagi hui gum
jise gham se kuchh mila hai vahi ham-nafas hai mera
jo shikasta saz-e-dil ho to suno mira tarannum
ye samajh lo zindagi hai safar-e-hazar-jada
gham-e-karvan se chhuTe to ‘nushur’ kho ga.e tum
Leave a Reply