Faiz Ahmad Faiz
chashm-e-maigun zara idhar kar de
dast-e-qudrat ko be-asar kar de
tez hai aaj dard-e-dil saaqi
talkhi-e-mai ko tez-tar kar de
josh-e-vahshat hai tishna-kam abhi
chak-e-daman ko ta jigar kar de
meri qismat se khelne vaale
mujh ko qismat se be-khabar kar de
lut rahi hai miri mata-e-niyaz
kaash vo is taraf nazar kar de
‘faiz’ takmil-e-arzu malum
ho sake to yunhi basar kar de
Leave a Reply