Yahan Jo Bhi Tha Tanha Tha Yahan Jo Bhi Hai Tanha Hai

Jameel Mazhari

yahan jo bhi tha tanha tha yahan jo bhi hai tanha hai

ye duniya hai ye duniya hai isi ka naam duniya hai

na bola un se jaata hai na dekha un se jaata hai

yahan gungon ki basti hai yahan andhon ka pahra hai

vo manzil thi tahayyur ki ye manzil hai tafakkur ki

vahan parda bhi jalva tha yahan jalva bhi parda hai

vo aalam tha ta.ayyun ka vahan parda hi parda tha

ye aalam hai tayaqqun ka yahan jalva hi jalva hai

sabhi majruh hain is said-gah-e-aish-o-hirman men

kisi ka zaḳhm ochha hai kisi ka zaḳhm gahra hai

jo vo ik ḳhush-ḳhayali thi to ye ik kam-nigahi hai

na vo phulon ka gulshan tha na ye kanTon ka sahra hai

vo ahl-e-qal ki majlis ye ahl-e-hal ki majlis

vahan jo kuchh tha maazi tha yahan jo kuchh hai farda hai

ye naddi to nahin jo ab-e-shirin de sake tum ko

hai paani utna hi namkin samundar jitna gahra hai

yahan tarshe hue lafzon ka sikka chal nahin sakta

ye bazar-e-ma.ani hai yahan moti bhi qatra hai

‘jamil’ ankhon ke paT kholo ise bhi ik nazar tolo

vo nairang-e-tasavvur tha ye nairang-e-tamasha hai