kaun kis ke saath rahta hai makan hote hue bhi
kaun chalta hai zamin par asman hote hue bhi
kaun jaane ḳhair ka pahlu kahin raushan ho shayad
ham tumhare shahr men hain be-aman hote hue bhi
tez barish men bhi kitne pyaas ke maare paḌe hain
dhuup men jalte hain kitne sa.eban hote hue bhi
is andheri raat men vo chand niklega yahan se
ik daricha ain-mumkin hai guman hote hue bhi
nau-shagufta ik shajar ka qad nikalna hai qayamat
aur us ka be-ḳhabar hona javan hote hue bhi
koi titli gul ka chehra chumti rahti hai akasr
phailti rahti hai ḳhushbu ra.egan hote hue bhi
is ghane jangal ka jalna apni sarhad se nikalna
bastiyon ko yaad hai sab kuchh dhuan hote hue bhi
mahi-e-be-ab sa betab hai saara zamana
aur main shadab huun atash-bajan hote hue bhi
zindagi main ne tumhen har haal men abad rakkha
rote hanste jiite marte be-nishan hote hue bhi
rah-e-sheristan se guzra hai koi ḳhurshid-‘akbar’
‘mir’ o ‘ghalib’ ka ilaqa darmiyan hote hue bhi
Leave a Reply