Poet
husn ki har ada pe marta huun
zindagi teri qadr karta huun
kho na jaa.en maze huzuri ke
saans lete hue bhi Darta huun
ishq ki hai ye kaun si manzil
gaah jiita huun gaah marta huun
kaun aarif hai azmat-e-gham ka
miT ke main aur bhi nikharta huun
ho ke pamal rah-e-ulfat men
kya bigaḌta huun kya sanvarta huun
bahr-e-gham men ye fikr kis ko hai
gharq hota huun ya ubharta huun
ghair ko raz-dar kya karta
main ‘bashir’ aap se bhi Darta huun
Leave a Reply