ḳhud miri ankhon se ojhal meri hasti ho ga.i
a.ina to saaf hai tasvir dhundli ho ga.i
saans leta huun to chubhti hain badan men haDDiyan
ruuh bhi shayad miri ab mujh se baghi ho ga.i
faash kar diin main ne ḳhud andar ki be-tartibiyan
zindagi ara.ishon men aur nangi ho ga.i
pyaar karti hain mire raston se kya kya bandishen
toḌ di zanjir to divar unchi ho ga.i
meri janib aa.e pas-manzar se patthar be-shumar
rang-e-duniya dekh kar bina.i zaḳhmi ho ga.i
paḌ gaya parda sama.at par tiri avaz ka
ek aahaT kitne hangamon pe haavi ho ga.i
kar gaya hai mubtala-e-karb aur ik saneha
aur kuchh din zinda rahne ki talafi ho ga.i
ḳhvahishon ki aag bhi bhaḌka.egi ab kya mujhe
raakh bhi meri ‘muzaffar’ ab to ThanDi ho ga.i
Leave a Reply