jama hua hai falak pe kitna ghubar mera
jo mujh pe hota nahin hai raaz ashkar mera
tamam duniya simaT na jaa.e miri hadon men
ki had se baḌhne laga hai ab intishar mera
dhuan sa uThta hai kis jagah se main janta huun
jalata rahta hai mujh ko har pal sharar mera
badal rahe hain sabhi sitare madar apna
mire junun pe Tika hai dar-o-madar mera
kisi ke raste pe kaise nazren jama.e rakkhun
abhi to karna mujhe hai ḳhud intizar mera
tiri ita.at qubul kar luun bhala main kaise
ki mujh pe chalta nahin hai ḳhud iḳhtiyar mera
bas ek pal men kisi samundar men ja girunga
abhi sitaron men ho raha hai shumar mera
Leave a Reply