Chaar Su Intishaar Hai Kya Hai

chaar su intishar hai kya hai

ye ḳhizan hai bahar hai kya hai

sab ko mashkuk tum samajhte ho

ḳhud pe bhi e’tibar hai kya hai

sava neze pe chahiye suraj

jism men barf-zar he kya hai

mujh ko manzil nazar nahin aati

duur tak rahguzar hai kya hai

koi aahaT talak nahin hoti

mere andar mazar hai kya hai

ek pal bhi nahin mira apna

zindagani udhar hai kya hai

mere hamdam zara bata mujh ko

ye javani ḳhumar hai kya hai

hai jo mujh se ‘asad’ gurezan sa

maslahat ka shikar hai kya hai

Leave a Comment