abdul-ahad-saaz

Alwida

ladakpan ki rafiq ai ham-nava-e-naghma-e-tifli

hamari gyarah saala zindagi ki dil-nashin vaadi

hamare zehn ki takhil ki ehsas ki sathi

hamare zauq ki rahbar hamari aql ki haadi

hamare daman-e-afkar par tera hi saaya hai

khusha schōl ki ham ne tujhi se faiz paaya hai

hamari dhadkanen tere hi bam-o-dar men pinhan hain

tire mahaul men ham sab ke mahsusat ghaltan hain

hamari arzuen tere dalanon men raqsan hain

nuqush-e-ahd-e-rafta tere mathe par numayan hain

hamare vaste tu ek lafani masarrat hai

hamen schōl tere zarre zarre se mohabbat hai

tire aghosh men bachpan ke ham ne din bitae hain

tire angan men kitna roe kitna muskurae hain

yahan masrur ankhon men nae arman jagae hain

yahan maasum honton se tarane ham ne gaae hain

tire saae men bachpan ki suhani yadgaren hain

hamare ahd-e-gum-gashta ke lamhon ki qataren hain

yahan se dosti ki kitni tamiren uthai hain

rafaqat ki hayat-afroz duniyaen basai hain

yahan par shokhiyon ki be-karan maujen bahain hain

yahan bazmen sajai hain yahan dhumen machai hain

tire pahlu men kitni hi anokhi vardaten hain

tire honton pe kitni hi tabassum-rez baten hain

tire daman se ham ne qimti lamhat paae hain

khulus-o-unsiyat ke be-baha jazbat paae hain

tire saghar se ham ne faiz ke jurat paae hain

hamari fikr ne tujh hi se rujhanat paae hain

tujhe pa kar jo paaya hai use ham kho nahin sakte

tire hain tere apne hain parae ho nahin sakte

nae sazon pe jab tere tarane gaae jaenge

nae ghunche tire gulzar men jab muskuraenge

nai kirnon se jab tere dariche jagmagaenge

nae arman jab tujh men nai jannat basaenge

nae sathi tire angan men jab dhumen machaenge

to shayad ham bhi ai schōl tujh ko yaad aenge

ye maana zindagi ham ko bahut masruf kar degi

hamare zehn ko duniya ke andazon se bhar degi

hazaron masalon par davat-e-fikr-o-nazar degi

ki jab thodi si mohlat gardish-e-sham-o-sahar degi

gham-e-dauran se jab bhi fursat-e-yak-lamha paenge

tiri yadon men kho jaenge khud ko bhuul jaenge

More Poems

Leave a Comment