agar un ke lab par gila hai kisi ka
to beja bhi shikva baja hai kisi ka
hasin hashr men sar jhukae hue hain
vafa aaj vaada hua hai kisi ka
vo joban bahut sar uthae hue hain
bahut tang band-e-qaba hai kisi ka
vo khud chahte hain koi ab satae
satana maza de gaya hai kisi ka
jo hain dast-e-gustakh apne salamat
to jhuta hi vaada vafa hai kisi ka
vo kyuun uth ke khalvat se mahfil men aaen
vo kya janen kya muddaa hai kisi ka
bana luun khuda to bhi mere na honge
buton men koi bhi hua hai kisi ka
koi god men jham se aa hi gaya hai
tasavvur hamen jab bandha hai kisi ka
‘riyaz’ aur hi rang men mast hain ab
suna hai pyala piya hai kisi ka
Leave a Reply