naqsh aḳhir aap apna hadisa ho ja.ega
aur tai vahm-o-yaqin ka marhala ho ja.ega
guunj uTThenge dar-o-divar apne karb se
lafz jo tishna hai ma.ani-ashna ho ja.ega
jism bhi pighlenge saa.e bhi na Thahrenge kahin
jaane kab ye sabz manzar bhi hava ho ja.ega
log sab us ki kahani jaan lenge harf harf
aur vo ḳhush-posh khul kar be-rida ho ja.ega
peḌ uglenge syahi ka samundar dekhna
mausam-e-ḳhush-rang ‘muztar’ zaḳhm-e-pa ho ja.ega
Leave a Reply