jab nazar us ki aan padti hai
zindagi tab dhiyan padti hai
jhel lete hain ashiq ai farhad
jis ke sar jaisi aan padti hai
hai jafa se gharaz use itni
ki vafa imtihan padti hai
nazar un mah-vishan ki hai zalim
kya ghazab an-ban padti hai
qadd-e-zahid nazar men chille baad
utri si kuchh kaman padti hai
baat is dil ke dard ki yaaro
guftugu men nidan padti hai
ek ke munh se jis ghadi nikli
phir to sau ki zaban padti hai
lekin itna koi kahe mujh se
kabhu us ke bhi kaan padti hai
be-sabati zamane ki na-char
karni mujh ko bayan padti hai
garm-joshi-e-dostan ba-nazar
atish-e-karvan padti hai
dil se puchha ye main ki ishq ki raah
kis taraf mehrban padti hai
kaha un ne ki ne ba-hindustan
ne su-e-asfhan padti hai
ye do-raha jo kufr o diin ka hai
donon ke darmiyan padti hai
manzilat sher ki tire ‘sauda’
yuun ba-vahm-o-guman padti hai
nahin ‘isa’ tu par sukhan se tire
tan-e-be-jan men jaan padti hai