Ashu Mishra
dil ki tarah hi ab miri duniya ḳharab hai
so apna haal in dinon achchha ḳharab hai
aansu bahe to yuun hua bina.i baḌh ga.i
phir saaf saaf dikh gaya kya kya ḳharab hai
pahle-pahal to main tira yak-tarfa ishq tha
ab mera haal tujh se ziyada ḳharab hai
duniya se tang shaḳhs ko achchhi hai ḳhud-kushi
gharqab hote shaḳhs ko tinka ḳharab hai
to ishq se miTa.enge duniya ki nafraten
‘mishra’ ji aap Thiik hain matha ḳharab hai
Leave a Reply