jo tum ho do qadam aage to ham hain do qadam pichhe
ye farq-e-do-qadam kya hai na tum aage na ham pichhe
sanam us ke jamali hain sanam us ke ḳhayali hain
ḳhuda-sazi tha shughl-e-dair rahta kyuun haram pichhe
ye kya insaf hai aadil baḌhaya tishnagi pahle
diya teri adalat ne shu.ur-e-shahad-o-sam pichhe
ye hai tariḳh ka darbar kuchh darvesh baiThe hain
khaḌe hain qaisar o faghfur o dara-e-ajam pichhe
bulandi shiddat-e-parvaz se banti ga.i yaani
nazar aage thi aur har fasla tha besh o kam pichhe
yahan bhi kar ke ik sajda vahan bhi kar ke ik sajda
musafir baḌh gaya chiḳha kiye dair o haram pichhe
gale us se bhi kaTte hain gale is se bhi kaTte hain
rahe kyuun ‘maz.hari’ talvar se apna qalam pichhe
Leave a Reply