Pas-E-Diwar Zindan Zindagi Maujud Rahti Hai

Poet

pas-e-divar zindan zindagi maujud rahti hai

andheri raat men bhi raushni maujud rahti hai

sar-e-darbar-o-maqtal ek sa mausam ana ka hai

garan sar men hamesha sar-kashi maujud rahti hai

ravan rakhte hain ham ko dasht-e-dariya dhuup darvaze

sarabon se safar men tishnagi maujud rahti hai

nazar se joḌ rakhta hai ye dil aise bhi nazzare

ki ba.ad-az-marg bhi hairangi maujud rahti hai

bahut asan rahen bhi bahut asan nahin hotin

sabhi raston men thoḌi gumrahi maujud rahti hai

miri sochon men yuun rach bas ga.e hain shabnami mausam

tavatur se tah-e-mizhgan nami maujud rahti hai

talatum men sada rahti hain kirnen husn-e-taban ki

nasib-e-dushmanan kuchh barhami maujud rahti hai

nikal paata nahin main kucha-e-be-nam se ‘azmi’

ki asbab-e-safar men kuchh kami maujud rahti hai