Suna Bhi Kabhi Majra Dard-O-Gham Ka Kisi Dil-Jale Ki Zabani Kaho To

Saail Dehlvi

suna bhi kabhi majra dard-o-gham ka kisi dil-jale ki zabani kaho to

nikal aa.en aansu kaleja pakaḌ lo karun arz apni kahani kaho to

tumhen rang-e-mai shaiḳh marghub kya hai gulabi ho ya za.afrani kaho to

pila.e koi saqi-e-hur-paikar musaffa kashida purani kaho to

tamanna-e-didar hai hasrat-e-dil ki tum jalva-farma ho main ankhen sekun

na kah dena muusa se jaise kaha tha miri arz par lan-tarani kaho to

vafa-pesha ashiq nahin dekha tum ne mujhe dekh lo janch lo aazma lo

tumhare ishare pe qurban kar duun abhi maya-e-zindagani kaho to

kahan main kahan dastan ka taqaza mire zabt-e-dard-e-nihan ka hai kahna

phir us par ye takid bhi hai barabar na kahna purani kahani kaho to

mire nama-e-shauq ki satr men hai jagah ik jo saada vo mohmal nahin hai

main ho ja.un ḳhidmat men hazir abhi ḳhud batane ko is ke ma.ani kaho to