vo mire paas hai kya paas bula.un us ko
dil men rahta hai kahan DhunDne ja.un us ko
aaj phir pahli mulaqat se aghaz karun
aaj phir duur se hi dekh ke aa.uun us ko
qaid kar luun use ankhon ke nihan-ḳhane men
chahta huun ki kisi se na mila.un us ko
use duniya ki nigahon se karun main mahfuz
vo vahan ho ki jahan dekh na pa.un us ko
chalna chahe to rakhe paanv mire siine par
baiThna chahe to ankhon pe biTha.un us ko
vo mujhe itna subuk itna subuk lagta hai
kabhi gir jaa.e to palkon se uTha.un us ko
mujhe ma.alum hai aḳhir ko juda hona hai
lekin ik baar to siine se laga.un us ko
yaad se us ki nahin ḳhali koi bhi lamha
phir bhi Darta huun kahin bhuul na ja.un us ko
mujh pe ye raaz isi ek havale se khula
baat us ki hai magar kaise bata.un us ko
ye mira dil mira dushman mira divana dil
chahta hai ki sabhi zaḳhm dikha.un us ko
aaj to dhuup men tezi hi bahut hai varna
apne saa.e se bhi ‘shahzad’ bacha.un us ko
Leave a Reply