kitne barse nagar nagar patthar
hausle kar na paa.e sar patthar
jo nishan-zad hue hain apne liye
vo to sab a.enge idhar patthar
baat kah di thi ik ḳhuda-lagti
meri samt aa.e kis qadar patthar
dekh mahngi paḌegi man-mani
bandhne honge peT par patthar
kis ne kichaḌ men sang maara hai
paḌ ga.e kis ki fahm par patthar
soch ke kar kisi pe sang-zani
aa bhi sakte hain lauT kar patthar
sab pe hasrat ki ik nazar karke
ho ga.i ek chashm-e-tar patthar
adl un ka ‘na.im’ kya kahna
phuul apni taraf idhar pathar
Leave a Reply