jab ham-baghal vo sarv qaba posh ho gaya
qumri ka tauq halqa-e-aghosh ho gaya
ashar mere sun ke vo khamosh ho gaya
ghuncha ba-rang-e-gul hama-tan-gosh ho gaya
pi ghair ne sharab mujhe be-khudi hui
nashsha chadha kisi ko main behosh ho gaya
is darja be-khudi ne dikhain taalliyan
gardun ghubar-e-qafila-e-hosh ho gaya
tegh-e-ajal ki kaat se darta nahin huun main
zakhmon se jism-e-zar zira-posh ho gaya
ai but khayal-e-vasf-e-dahan men na paai raah
bhatka phira sukhan jo main khamosh ho gaya
khun-khvaron ke huzur na aaya hamari tarah
aina jauharon se zira-posh ho gaya
talea jagae aap ne arbab-e-ishq ke
yusuf ka husn khvab-e-faramosh ho gaya
pinhan hai zer-e-sabza-e-khat atish-e-ezar
shoala fusun-e-husn se khas-posh ho gaya
huren gale lipatti hain aa aa ke raat din
jannat ki raah kucha-e-aghosh ho gaya
us mast-e-husn ki nigah-e-garm ke huzur
aina-e-jam bada-e-sar-josh ho gaya
be-lutfiyon se tum jo mile main ne jaan di
phansi gale men halqa-e-aghosh ho gaya
abr-e-siyah ke saaye ne surma khila diya
sabza tamam tuti-e-khamosh ho gaya
kandhon se mere katib-e-amal gir pade
tadpa main is qadar ki subuk-dosh ho gaya
kanon ka husn jalva-e-ariz se pad gaya
rukh aftab-e-subh buna-gosh ho gaya
udta huun ishq men lab lalin ke ai ‘munir’
goya sharar atish-e-khamosh ho gaya