kuchh bhi ho mira haal numayan to nahin hai
dil chaak sahi ḳhair gareban to nahin hai
husn-e-talab-e-barq hai ta.amir-e-nasheman
varna havas-e-sair-e-gulistan to nahin hai
kuchh naqsh tiri yaad ke baaqi hain abhi tak
dil be-sar-o-saman sahi viran to nahin hai
ham dard ke maare hi garan-jan hain vagarna
jiina tiri furqat men kuchh asan to nahin hai
TuuTa to aziiz aur hua ahl-e-vafa ko
dil bhi kahin us shoḳh ka paiman to nahin hai
Leave a Reply