Allah-Re Faiz Ek Jahan Mustafid Hai

Bedam Shah Warsi

allah-re faiz ek jahan mustafid hai

har mast mere pir-e-mughan ka murid hai

vaaiz abas ye zikr-e-azab-e-shadid hai

ik tauba qufl-e-rahmat-e-haq ki kalid hai

vahshat ne ham ko jama-e-khaki pahna diya

ai aql ab ye kaahe ki qat-o-burid hai

ai rah-ravan-e-jada-e-ulfat badhe chalo

ye kis ne kah diya hai ki manzil baiid hai

kyun-kar na qurb-e-haq ki taraf dil mira kijiye

gardan asir-e-halqa-e-habl-ul-varid hai

ab jam-e-jam ki mujh ko zarurat nahin rahi

vo dil mila hai jis men do-alam ki diid hai

vallail hai ki zulf-e-muammar huzur ki

ye ru-e-pak hai ki kalam-e-majid hai

halki si ik kharash hai qasid ke halaq par

ye khat javab-e-khat hai ki khat ki rasid hai

khanjar-ba-kaf vo kahte hain ab aae samne

kis ko khayal-e-vasl hai arman-e-did hai

mujh khasta-dil ki iid ka kya puchhna huzur

jin ke gale se aap mile un ki iid hai

tu dekhe aur bande pe tere azaab ho

ya-rab ye teri shan-e-karam se baiid hai

shishe ka mo’taqid hai iradat hai jaam se

kis pir-e-mai-farosh ka ‘bedam’ murid hai